އިނގިރޭސިވިލާތުގައި ބުއިންތަކުން ހަކުރު ޓެކްސް ނަގަނީ

ފަލަވުމާ ދެކޮޅަށް އިނގިރޭސިވިލާތުގައި އާ ފިޔަވަޅުތަކެއް އަޅަން ފަށައިފި އެވެ. އެގޮތުން މިލްކްޝޭކާއި ޕެކޭޖްކޮށްފައިވާ ހަކުރު އަޅާފައިވާ ބުއިންތަކުން އައު ހަކުރު ޓެކްސްއެއް ނަގަން ނންމައިފި އެވެ.

އިނގިރޭސި ސަރުކާރުން ނިންމާފައިވަނީ ބަންދުކޮށްފައިވާ ބުއިންތަކުގައި ހުންނަ ހަކުރުގެ ނިސްބަތް ކޮންމެ 100 މިލިލީޓަރަށް 5 ގްރާމުން 4.5 ގްރާމަށް މަދުކުރުމަށެވެ. އަދި އެ ބުއިންތަކުގައި ހިމެނޭ ހަކުރުގެ ނިސްބަތް ކަނޑައަޅާފައިވާ 4.5 ގްރާމަށްވުރެ އިތުރުވެއްޖެނަމަ ހަކުރު ޓެކްސް ނަގާ ގޮތަށެވެ.

އިނގިރޭސިވިލާތުގެ ހެލްތު މިނިސްޓަރު ވެސްޓް ސްޓްރެޓިން ޕާލަމެންޓްގައި ވާހަކަ ދައްކަވަމުން ވިދާޅުވީ ފަލަވުމަކީ ކުދިންގެ ދިރިއުޅުމުގެ ރަނގަޅު ކަންކަމުން މަހުރޫމްވާ ކަމެއް ކަމަށާއި އެކަމުން އެންމެ ބޮޑަށް އަސަރުކުރަނީ އެންމެ ނިކަމެތި މީހުންނަށް ކަމަށެވެ.

ހެލްތު މިނިސްޓަރު ވިދާޅުވީ ފަލަ މީހުންނަށް މުޅި އުމުރު ދުވަހު ސިއްހީ މައްސަލަތައް ކުރިމަތިވާ ކަމަށާއި އެ މީހުންނަށް ފަރުވާ ދިނުމަށް ސަރުކާރަށް އެތައް ބިލިއަން ޕައުންޑެއް ހޭދަކުރަން ޖެހޭ ކަމަށެވެ.

މީޑިއާ ރިޕޯޓްތައް ބުނާ ގޮތުގައި ކެފޭތަކާއި ފިހާރަތަކުން ލިބެން ހުންނަ ބުއިންތަކުން ހަކުރު ޓެކްސްއެއް ނުނަގާނެ އެވެ. އަލަށް ތައާރަފް ކޮށްފައިވާ ހަކުރު ޓެކްސް ނެގުމަށް އަމަލުކުރަން ފަށާނީ 2028 ވަނަ އަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެންނެވެ.

ހިއްސާ ކުރައްވާ!