ސޫދާނުގެ ނޫބިއަން ސަހަރާގައި މިޞްރުގައި ހުންނަ ޕިރަމިޑްތަކަށް ވުރެން ގިނަ އަހުރާމްތައް (ޕިރަމިޑް) ހުރެއެވެ. އެސަރަހައްދުގައި ޖުމްލަ 200 އަށްވުރެ ގިނަ އަހުރާމް ހުރެއެވެ. މީގެ ތެރެއިން ގިނަ އަހުރާމްތައް ފެންނަން ހުރީ މެރޯ، ނޫރީ އަދި ޖަބަލް ބަރްކަލް އިންނެވެ.
މި އަހުރާމްތަކަކީ ނީލަކޯރުގެ ވާދީގައި ގާތްގަނޑަކަށް 1،000 އަހަރު ވަންދެން ވެރިކަންކުރި އެފްރިކާގެ ވަރުގަދަ ތަހުޒީބެއް ކަމަށްވާ ކޫޝް ރަސްކަމުގެ ދުވަސްވަރު ބިނާކޮށްފައިވާ ތަންތަނެވެ. ކޫޝްގެ ރަސްކަމަކީ އޭރުގެ ވަރުގަދަ ބާރެކެވެ. އެމީހުން ވަނީ މިޞްރުގައި ރަސްކަން ކުރި 25 ވަނަ ދަރިކޮޅުގެ ގޮތުގައި ވެރިކަން ކޮށްފައެވެ. މި ދަރިކޮޅު މަޝްހޫރުވެފައިވަނީ ކަޅު ނަސްލުގެ ފިރުއައުނުންގެ ނަމުންނެވެ.
ކޫޝް ވެރިކަން ފެށިފައި ވަނީ އީސާގެފާނުގެ 2500 އަހަރު ކުރިންނެވެ.
ސޫދާނުގައި ހުރި އަހުރާމްތަކަކީ މިޞްރުގެ އަހުރާމްތަކާ އަޅާބަލާއިރު ސައިޒުން ކުދި ތަންތަނެވެ. ނަމަވެސް މިސްރުގެ އަހުރާމްތަކަށް ވުރެން އުސްކޮށް ހުންނަ ތަންތަނެވެ. މި ތަންތަން ބޭނުންކޮށްފައިވަނީ ރަސްރަސްކަލުންނާއި، ރަނިންނާއި، އަދި އިއްޒަތްތެރިން ވަޅުލާ މަގްބަރާތަކެއްގެ ގޮތުގައެވެ. މި މަގްބަރާތަކުން ފެނިފައިވާ ކުރެހުންތަކާއި، މަށީގެ ތަކެއްޗާއި، އަދި ގަހަނާތަކުން އެފްރިކާގެ އާދަކާދަތަކާއި މިޞްރުގެ ސަގާފަތް މަސްހުނިވެފައިވާ މިންވަރު ހާމަވެއެވެ.
މި އާސާރީ ބިނާތަކަކީ ސޫދާނުގައި ކުރިއަރާފައިވާ ތަހުޒީބެއް އޮތްކަމުގެ ދިރިހުރި ހެއްކެކެވެ. އެގޮތުން ވަރުގަދަ ވެރިކަމުގެ ނިޒާމަކާއި، ވިޔަފާރީގެ ގުޅުންތަކާއި، އަދި އަމިއްލަ ލިޔުމުގެ ނިޒާމެއް އެ ތަހުޒީބުގައި އޮތްކަން މި ބިނާތަކުން އެނގެއެވެ. މިއީ އެފްރިކާގެ ތާރީޚާއި ސޫދާނުގެ އަމިއްލަވަންތަކަމާ ގުޅިފައިވާ މުހިންމު ބައެކެވެ.
ނަމަވެސް، މިއަދު މި އަހުރާމްތަކަށް ވަނީ ހަނގުރާމައާއި، ވައްކަންކުރުމާއި، އަދި އަޅާނުލެވި ދޫކޮށްލުމުގެ ސަބަބުން ބޮޑެތި ނުރައްކާތަކެއް ކުރިމަތިވެފައެވެ. ވަސީލަތްތައް މަދު ނަމަވެސް، ސޫދާނުގެ މަދު ބަޔަކު ދަނީ މި ތަންތަން ރައްކާތެރިކުރުމަށް މެދުކެނޑުމެއްނެތި މަސައްކަތް ކުރަމުންނެވެ.
ސޫދާނުގެ އަހުރާމްތަކަކީ މުޅި ދުނިޔޭގެ ތަރިކައެއްގެ ގޮތުގައި ބެލެވޭ، ކޫޝް ރަސްކަމުގެ މުއްސަނދި ތާރީޚު ހަނދާންކޮށްދޭ އަގުހުރި ބިނާތަކެކެވެ.
