މިއަހަރު ބާއްވާ ވޯލްޑް ކަޕް ފުޓްބޯޅަ މުބާރާތުގެ މެޗުތައް މާލޭގެ އެކި ސަރަޙައްދުތަކުގައި ބޮޑު ސްކްރީން ބަހައްޓައިގެން ދެއްކުމަށް ޝައުޤުވެރިވާ އަމިއްލަ ފަރާތްތަކަށް އެ ޙުއްދަ ދިނުމަށް މާލެ ސިޓީ ކައުންސިލުން މިއަދު އިއްތިފާޤުން ފާސްކޮށްފިއެވެ. ކައުންސިލުގެ ރަސްމީ ޢާންމު ޖަލްސާގައި މިގޮތަށް ނިންމީ، އަމިއްލަ ޚަރަދުގައި މިކަން ކުރުމަށް ގިނަ ބައެއްގެ ހުށަހެޅުންތައް ކައުންސިލަށް ލިބެމުންދާތީއެވެ.
މާލޭގެ މޭޔަރު އާދަމް އާޒިމް ޖަލްސާގައި ވިދާޅުވީ، ދިވެހިންގެ މެދުގައި ބޮޑު ފޯރިއެއް އޮންނަ ވޯލްޑް ކަޕް މެޗުތައް އާންމު ތަންތަނުގައި ބޮޑު ސްކްރީން އަޅުވައިގެން ބެލުމުގެ ޑިމާންޑް ވަރަށް ބޮޑު ކަމަށެވެ. އަދި މިކަމަށް އެދި ހުށަހަޅާފައިވާ ޕްރޮޕޯސަލްތަކަކީ ކައުންސިލުން އެއްވެސް ޚަރަދެއް ކުރަންނުޖެހޭ ގޮތަށް، އަމިއްލަ ޚަރަދުގައި ކުރިއަށްގެންދާން ހުށަހަޅާފައިވާ ކަންކަން ކަމަށް މޭޔަރު ފާހަގަކުރެއްވިއެވެ.
މި ހުށަހެޅުންތަކަށް ހުއްދަދޭން ކައުންސިލަރުން ތާއީދުކުރެއްވި ނަމަވެސް، މެޗުތައް ދައްކާނީ ވަކި ފެންވަރެއް ހިފެހެއްޓިގެން، ފުރިހަމަ އިންތިޒާމުތަކަކާއެކު ކަން ކަށަވަރުކުރަންޖެހޭނެ ކަމަށް ވިދާޅުވިއެވެ. އެގޮތުން ކައުންސިލަރުން ބާރުއެޅުއްވި މުހިންމު ކަންތައްތަކަކީ:
-
ފުޓްބޯޅަ އީދެއްގެ ސިފަގެނައުން: ހަމައެކަނި ބިމެއް ހޯދައިގެން ޕްރޮޖެކްޓަރެއް އެޅުވުމުގެ ބަދަލުގައި، މުޅި ސަރަޙައްދު ފުޓްބޯޅަ އީދެއްގެ ގޮތަށް ފަރުމާކޮށް އިންތިޒާމުތައް ރޭވުން.
-
އާންމުންނަށް އުނދަގޫނުވުން: މެޗުތައް ކުޅޭ ގަޑިތަކުގެ ގޮތުން، އެ ސަރަޙައްދުތަކުގައި ދިރިއުޅޭ ކައިރި ގޭގޭގެ މީހުންނަށް އުނދަގޫނުވާނެ ގޮތަކަށް އަޑާއި އިންތިޒާމުތައް ބެހެއްޓުން.
-
ތޮއްޖެހުން ކުޑަކުރުން: ވޯލްޑް ކަޕް މެޗުތައް ބަލަން ދިވެހިންގެ އިތުރުން ގިނަ އަދަދެއްގެ ބިދޭސީންވެސް އެއްވާތީ، އެންމެން އެއްތަނަކަށް ޖަމާވެ ހަލަބޮލިނުވާނެ ފަދަ ރޭވުންތެރި ގޮތްތަކެއް ހަމަޖެއްސުން.
މި ހުރިހާ ޝަރުޠުތަކާއި އިންތިޒާމުތަކަށް ރިޢާޔަތްކުރުމަށްފަހު، ޖަލްސާގައި ބައިވެރިވި ހުރިހާ ކައުންސިލަރުންގެ ފުރިހަމަ ތާއީދާއެކު މި ހުއްދަ ދޭން ވަނީ ނިންމާފައެވެ.
