އިދިކޮޅު ޕާކިސްތާން ތަހްރީކޭ އިންސާފް (ޕީޓީއައި) ގެ ބާނީ އިމްރާން ޚާން މިނިވަންކުރުމަށް ގޮވާލައި އޮކްޓޯބަރު މަހު އިސްލާމްއާބާދަށް ބާއްވަން ރާވާފައިވާ އިހުތިޖާޖުކުރުމުގެ މާޗު ހުއްޓުމެއް ނެތި ކުރިއަށް ދާނެ ކަމަށް ޚައިބަރު ޕަޚްތޫންޚުވާގެ ޗީފް މިނިސްޓަރ ސުހައިލް އަފްރީދީ ވިދާޅުވުމާއެކު، އެ ޕްރޮވިންސްގެ ސަރުކާރު އުވާލައި ގަވަރނަރުގެ ވެރިކަން ގެނަސް ކުއްލި ނުރައްކަލުގެ ހާލަތު އިއުލާންކޮށްފާނެ ކަމުގެ އިންޒާރު ޕާކިސްތާން ސަރުކާރުން ދީފިއެވެ.
ޕޭޝާވަރުގައި ބޭއްވި ނޫސްވެރިންގެ ބައްދަލުވުމެއްގައި އަފްރީދީ ވިދާޅުވީ، މިއީ ގައުމުގެ ތާރީޚުގައި ވެސް ނުފެންނަ ފަދަ ބޮޑު މާޗަކަށް ވެގެންދާނެ ކަމަށެވެ. އެގޮތުން އިހުތިޖާޖުގެ ފުރަތަމަ މަރުހަލާގައި މުޒާހަރާގެ ބައިވެރިން ޕަންޖާބު އިމާ ގުޅޭ ސުވާބީ ސަރަހައްދަށް އެއްވާނެ ކަމަށާއި، އެއަށްފަހު ކުރިއަށް ދިއުމަށް ފިޔަވަޅު އަޅާނެ ކަމަށް އޭނާ ވިދާޅުވިއެވެ. އަދި ޚައިބަރު ޕަޚްތޫންޚުވާގެ ރައްޔިތުން އެމީހުންގެ ސިޔާސީ މެންޑޭޓް ހިމާޔަތްކުރާނެ ކަމަށް ވިދާޅުވެ، މަރުކަޒީ ސަރުކާރުން އެއްވެސް "ނުރައްކާތެރި ފިޔަވަޅެއް" އެޅުމާ ދެކޮޅަށް އޭނާ ވަނީ އިންޒާރު ދެއްވާފައެވެ.
އަފްރީދީ އިތުރަށް ތުހުމަތު ކުރެއްވި ގޮތުގައި، ވެރިކަން ކުރާ ޕާކސިްތާން މުސްލިމު ލީގް ނަވާޒް އިން ދަނީ ޕީޓީއައިގެ ސަފުތަކުގެ ތެރެއަށް އެޕާޓީގެ އޭޖެންޓުން ވައްދައި، ހަމަނުޖެހުން އުފެއްދުމަށް ރާވަމުންނެވެ.
"އަޅުގަނޑުމެންނީ ސުލްހަވެރި ބައެއް. އަޅުގަނޑުމެންގެ ސަފުތަކުގައި ހަތިޔާރެއް ނުހުންނާނެ. އަދި ހަމަނުޖެހުން އުފައްދަން މަސައްކަތްކުރާ އެއްވެސް މީހަކީ އަޅުގަނޑުމެންގެ ބައިވެރިއެއް ނޫން،" އޭނާ ވިދާޅުވިއެވެ. މީގެ އިތުރުން، ފާއިތުވި 22 އަހަރު ދުވަހު މަރުކަޒީ ސަރުކާރުން ގެންގުޅުނު ޓެރަރިޒަމާ ދެކޮޅު ސްޓްރެޓެޖީ ވަނީ ނާކާމިޔާބުވެފައި ކަމަށާއި، އެކަން ހުއްޓުވުމުގެ ގާބިލުކަން އޮތީ ހަމައެކަނި ޕްރޮވިންސް ސަރުކާރަށް ކަމަށް ވެސް އޭނާ ފާހަގަކުރެއްވިއެވެ.
މި ކަމާ ގުޅިގެން މަރުކަޒީ ސަރުކާރުގެ ވަޒީރުން ވަނީ ޕީޓީއައިއާއި އަފްރީދީގެ ސިޔާސަތުތަކަށް ފާޑުވިދާޅުވެފައެވެ. ވަޒީރުން ފާހަގަކުރެއްވި ގޮތުގައި، ޚައިބަރު ޕަޚްތޫންޚުވާގައި ސަލާމަތީ ގޮންޖެހުންތަކާއި ޓެރަރިޒަމްގެ ނުރައްކާ ބޮޑުވެފައިވާ ދަނޑިވަޅެއްގައި، ޕްރޮވިންސް ސަރުކާރުން އިސްކަންދެނީ ސިޔާސީ މުޒާހަރާތަކަށެވެ. އަދި ލޯ މިނިސްޓަރު އައުޒަމް ނަޒީރު ތަރާރު އަދި ބޮޑުވަޒީރުގެ ސިޔާސީ މުޝީރު ރާނާ ސަނާޢުﷲ ވަނީ، ސުލްހަމަލަސްކަންތް ގާއިމުކުރުމަށްޓަކައި ގަވަރނަރުގެ ވެރިކަން ގާއިމުކުރުމާއި ކުއްލި ނުރައްކަލުގެ ހާލަތު އިއުލާންކުރުން ފަދަ ހުރިހާ ފިޔަވަޅުތަކެއް ސަރުކާރުގެ މޭޒުމަތީގައި އެބަހުރި ކަމަށް ވިދާޅުވެފައެވެ.
ޚައިބަރު ޕަޚްތޫންޚުވާގެ ގަވަރނަރު ފައިސަލް ކަރީމް ކުންޑީ ވެސް ވަނީ، ސިޔާސީ ހަމަނުޖެހުންތަކާއި ގާނޫނީ އިމުން ބޭރުވުން އިތުރުވާނަމަ، ގަވަރނަރުގެ ވެރިކަން ގާއިމުކުރުމުގެ ފުރުސަތު އޮތް ކަމަށް ވިދާޅުވެފައެވެ.
