އިސްލާމީ މުފައްކިރު އަދި ދިރާސާވެރިޔާ އަދި ޚަޠީބު ޑޮކްޓަރ މުޙައްމަދު ޞުބުޙީ އަލްޢާއިދީ، އަށް މިންބަރަށް އެރުމާއި ހުކުރު ޚުޠުބާ ކިޔުމާއި ދީނީ ނަސޭހަތް ދިނުން އުރުދުން ސަރުކާރުން މަނާ ކޮށްފިއެވެ. އޭނާގެ މައްސަލައަކީ އިސްލާމިކް މިނިސްޓަރަށް ވުރެން މޮޅަށް މަޒްމޫނެއް ލިޔެ ޝާއިއު ކުރުމާ ގުޅިގެން ވަޒީރު އެކަމާ މެދު ގަޔާ ނުވުމެވެ.
ޑޮކްޓަރ މުޙައްމަދު ޞުބުޙީ އަލްޢާއިދީ، ލިޔުއްވި މަޒުމޫނާ ގުޅިގެން އެންމެ ފުރަތަމަ އޭނާ މަގާމުން މުސްކުޅިކޮށް ވަޒީފާއިން ވަކި ކުރީ އެވެ. އެއަށްފަހު ވައުޒު ބުނުން އޭނާއަށް މަނާ ކުރީއެވެ.
30 އަހަރަށްވުރެ ގިނަ ދުވަހު މިންބަރުގައި ހުކުރު ޚުޠުބާ ދެއްވި މަގްބޫލު ޑޮކްޓަރ ޢާއިދީ ވިދާޅުވީ، އަންނަ ހުކުރު ދުވަހުން ފެށިގެން އޭނާ ޚުޠުބާ ދިނުން މަނާކޮށްފައިވާކަން އިސްލާޟިކް މިނިސްތްރީން އޭނާއަށް އަންގާފައިވާ ކަމަށެވެ. މިއީ އިސްލާމީ ކަންތައްތަކާ ބެހޭ މިނިސްޓްރީ އިން އޭނާ އަވަސް ނިޔާގެ ދަށުން ރިޓަޔަރ ކޮށްފައިވާ ކަން އިއުލާން ކުރިތާ ކުޑަވަގުތުކޮޅެއްގެ ތެރޭގައި ނިންމި ނިންމުމެކެވެ.
ޑޮކްޓަރ ޢާއިދީ ހާމަކުރެއްވި ގޮތުގައި، މި ފިޔަވަޅުތައް އޭނާއާ ދެކޮޅަށް އަޅާފައިވަނީ މަރުވުމަށްފަހު ގުނަވަން ހަދިޔާ ކުރުމުގެ ޚިދުމަތާ މެދު އޭނާ "ސަނަދު" އެޕްލިކޭޝަން މެދުވެރިކޮށް ލިޔުއްވި ފިޤުހީ ރައުޔަކާ ގުޅިގެން ނެވެ. މި ލިޔުމަށްފަހު އޭނާއާއެކު އިސްލާމިކް މިނިސްޓްރީން ތަހުގީގެއް ކުރިއަށް ގން ދިޔައެވެ.
ޑޮކްޓަރ ޢާއިދީ ލިޔުއްވާފައި ވަނީ ގުނަވަންހަދިޔާ ކުރުމުގެ ގެ ބަދަލުގައި "ގުނަވަންތަކުގެ ބޭނުންހިފުމަށް ހުއްދަދިނުން" މި އިބާރާތް ރަސްމީ ލިޔުންތަކުގައި ބޭނުންކުރުމަށާއި، އަދި އޭގެ އިތުރުން ގުނަވަނުގެ ބޭނުން ހިފާއިރު ވާރުތަވެރިންގެ ހުއްދައާ ގުޅޭ ބައެއް އުސޫލުތައް ވެސް މުރާޖަޢާކުރަން ޖެހޭ ކަމަށެވެ.
އޭނާ ވިދާޅުވީ، އެ ލިޔުމުގައި އިސްލާމީ ކަންކަމާ ބެހޭ ވަޒީރަށް ނުވަތަ ރަސްގެފާނަށް ކުޑައިމީސްކަން ރައްދުވާ އެއްވެސް ވާހަކައެއް ލިޔުއްވާފައި ނުވާނެ ކަމަށެވެ. އަދި އޭނާ ފާޅުކުރައްވާފައިވާ ޚިޔާލަކީ ހަމައެކަނި ފިޤުހީ އަދި އިލްމީ ބަހުސެއްގެ ތެރެއިން ލިޔުއްވި ލިޔުމެއް ކަމަށެވެ.
އޭނާގެ ފިޤުހީ ރައުޔުގެ ސަބަބުން ވަޒީރު ކޯފާވެ، އަވަސްއަރުވާލައިގެން ފިޔަވަޅުތައް އަޅަމުންދާތީ، މިއީ ޚިޔާލުފާޅުކުރުމަށް ހުރަސްއެޅުމުގެ އަމަލެއްގެ ގޮތުގައި ސިފަކުރައްވައި، އޭނާ ދީނީ ނަސޭހަތް ދިނުން މަނާކުރި ސަރީޙަ ސަބަބު ހާމަކުރުމަށް މިނސިްޓަރަށް އޭނާ ވަނީ ގޮވާލައްވާފައެވެ.
