އިސްރާއީލުގެ ޢަރަބި ރައްޔިތުންނާ ދެކޮޅަށް ނަތަންޔާހޫ ނަސްލީ ތަފާތުކުރުމުގެ ކެމްޕޭނެއް ހިންގާ: ގާޑީ އައިޒެންކޮޓް 

އިސްރާއީލުގެ ބޮޑުވަޒީރުކަމުގެ ދައުރު ހަމަވަމުންދާ ބެންޖަމިން ނަތަންޔާހޫއާއި އޭނާގެ ގާތް މީހުން އިސްވެ ތިއްބެގެން، އިސްރާއީލުގައި ޢަރަބި ދަރިކޮޅުގެ ރައްޔިތުންނާ ދެކޮޅަށް ނަސްލީ ތަފާތުކުރުމުގެ ވަރުގަދަ ކެމްޕޭނެއް ހިންގަމުން ގެންދާ ކަމަށް ވިދާޅުވެ، އައު ސަރުކާރު އެކުލަވާލުމަށް ހަވާލުކުރައްވާފައިވާ "ޔަޝާރް" ޕާޓީގެ ލީޑަރު ގާޑީ އައިޒެންކޮޓް ފާޑުވިދާޅުވެއްޖެއެވެ.

އިސްރާއީލުގެ ރައީސް އިސްހާޤް ހަރްޒޮގް، ސަރުކާރު އެކުލަވާލުމުގެ މަސައްކަތް އައިޒެންކޮޓާ ހަވާލުކުރިތާ ގާތްގަނޑަކަށް ހަފްތާއެއް ފަހުން ހުކުރު ދުވަހު ޢާންމުކުރި ދިގު ބަޔާނެއްގައި އޭނާ ބުނެފައި ވަނީ، އިސްރާއީލުގެ އާބާދީގެ %21 ޙިއްޞާކުރާ ޢަރަބި ރައްޔިތުންގެ އަގުވައްޓާލައި، އެމީހުންގެ ޙައްޤުތައް ނިގުޅައިގަތުމަށް އިންތިޚާބީ ކެމްޕޭން ފެށުނީއްސުރެ ނަތަންޔާހޫގެ ފަރާތުން ސިޔާސީ ބޭނުމަށްޓަކައި މަސައްކަތްތަކެއް ކުރަމުންދާ ކަމަށެވެ. ޔެދިއޮތް އަހްރޮނޮތް ނޫހާ ހަވާލާދީ ރިޕޯޓުކޮށްފައިވާ ގޮތުގައި، އައިޒެންކޮޓް ވަނީ އޭނާގެ ވެރިކަމުގައި ސަރުކާރެއް އެކުލަވާލުމަށް ކުރަމުންދާ މަސައްކަތްތައް ހުއްޓާނުލައި ކުރިއަށް ގެންދަވާނެ ކަމުގެ ޔަޤީންކަން ދީފައެވެ.

އައިޒެންކޮޓް ފާހަގަކުރި ގޮތުގައި، އިސްރާއީލުގެ ބޮޑުވަޒީރަކީ ވޯޓު ދިން މީހުންނާއި ނުދޭ މީހުން ހިމެނޭހެން، އެ ޤައުމުގެ އެންމެހާ ރައްޔިތުންގެ ބޮޑުވަޒީރެވެ. އަދި ޢަރަބި ރައްޔިތުންނަކީ އިސްރާއީލުގެ ތާރީޚާއި މުޖުތަމަޢުގެ މުހިންމު ބައެއް ކަމަށާއި، މުޅި އެ އާބާދީ އެއްކޮށް ބާކީކޮށްލައި އެމީހުންގެ ސޫރަ ކިލަނބުކުރުމަށް ކުރާ މަސައްކަތަކީ އިސްރާއީލުގެ މިނިވަންކަމުގެ ލިޔުމަށާއި އެ ޤައުމުން ފަޚުރުވެރިވާ އަގުތަކަށް ކުރެވޭ ބޮޑު އިހާނެތިކަމެއް ކަމަށް އޭނާ ބުންޏެއެވެ. ޢަރަބި ސިޔާސީ ޕާޓީތަކުގެ މަންދޫބުންނާމެދު ޚިޔާލު ތަފާތުވުން އޮތް ނަމަވެސް، މުޅި ޢަރަބި އާބާދީގެ އަގުވައްޓާލުމުގެ ފުރުޞަތު ނުދޭނެ ކަމަށް އޭނާ ބުންޏެވެ.

ސަރުކާރު އެކުލަވާލުމުގެ މަޝްވަރާތަކާ ގުޅޭގޮތުން ވާހަކަދައްކަމުން އައިޒެންކޮޓް ބުނީ، އޭނާ ހުށަހަޅާ މައިގަނޑު ހަތަރު އުޞޫލަށް އެއްބަސްވާ ޤާނޫނު ހަދާ މަޖިލީހުގެ ހުރިހާ ބްލޮކްތަކާއި މެންބަރުންނާ ގުޅިގެން، ވީ އެންމެ އަވަހަކަށް ހަރުދަނާ ސަރުކާރެއް އެކުލަވާލުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އަދި ބުރާސްފަތި ދުވަހުގެ ރޭ ނަތަންޔާހޫއާއެކު ބޭއްވި ސަލާމަތީ ބްރީފިންގގެ ތަފްޞީލުތައް ހާމަ ނުކުރާނެ ކަމަށް ވިދާޅުވަމުން، މި ނާޒުކު އިންތިޤާލީ މަރުޙަލާގައި ސަރުކާރުގެ ޢަމަލުތައް ވަރަށް ގާތުން މޮނިޓަރކޮށް ފާރަވެރިވާންޖެހޭ ކަމަށް އޭނާ ބުންޏެވެ.

މީގެއިތުރުން، އައިޒެންކޮޓްގެ ޕާޓީއަށް ނިސްބަތްވާ މަޖިލިސް މެންބަރުންނަށާއި އެ ބޭފުޅުންގެ ޢާއިލާތަކަށް އަމާޒުކޮށް ހުތުރު ބަހުރުވައިން އެތައް ހާސް މެސެޖުތަކެއް ފޮނުވައިގެން ބިރުދެއްކުމުގެ "ވިހަގަދަ" ކެމްޕޭނެއް ނަތަންޔާހޫ ހިންގަމުންދާތީ އޭނާ ވަނީ ކަންބޮޑުވުން ފާޅުކޮށްފައެވެ.

"މެދުވެރިން ފޮނުވައިގެންނާއި ބިރުދައްކައިގެން އަޅުގަނޑުމެންގެ މަޤްޞަދުން އެއްކިބާކުރެވިދާނެ ކަމަށް ހީކުރުމަކީ ކުށްހީއެއް. ވިހަ ބަސްތަކުން އަޅުގަނޑުމެން ފަހަތަށް ޖެއްސޭނެ ކަމަށް ޤަބޫލުކުރާ މީހުންނަށް އަޅުގަނޑުމެން ރަނގަޅަށް ނޭނގެނީ،" އައިޒެންކޮޓް އޭނާގެ ބަޔާނުގައި ބުނެފައިވެއެވެ.  

ހިއްސާ ކުރައްވާ!