ދުނިޔޭގައި ހުރި އެންމެ ދުވަސްވީ ގަސްތަކުގެ ތެރެއިން ބައެއް ގަސްތައް ހިމެނޭ ތަންތަންވަނީ އެ ގަސްތަކަށް ގެއްލުންވިޔަ ނުދިނުމަށްޓަކައި ސިއްރުކޮށްފައެވެ. އެމެރިކާގެ އިރުމަތީ ކެލިފޯނިއާގެ ހުދު ފަރުބަދަތަކުގައި ކަށިފެށި ޕައިން ގަހަކީ، ދުނިޔޭގެ އެންމެ ދުވަސްވީ ގަސްތަކުގެ ތެރޭގައި ހިމެނޭ ދެ ވަނައަށް އެންމެ ދުވަސްވީ ގަހެވެ. މިގަހުގެ އުމުރަކީ، ގާތްގަނޑަކަށް 4857 އަހަރު ކަމަށް ލަފާ ކޮށްފައި ވެއެވެ. މި ގަސް ހުރިތަންވެސް ވަނީ ސިއްރުކޮށްފައެވެ
މުއައްރިޚުން ބުނަނީ، މިއީ މިޞްރުގެ ޕިރަމިޑްތަކަށް ވުރެން ގިނަ ދުވަސްވެފައިވާ އަދިވެސް ދިރިހުރި ގަހެއް ކަމަށެވެ.
މި ގަހަށް ވުރެން ގިނަ ދުވަސްވެފައިވާ އެހެން ގަހަކީ، ޗިލީގެ ފަރުބަދަތަކުގައި ހުރި 'އަލެރްސް މިލެނާރިއޯ' ނަމަކަށް ކިޔާ ބާތުގެ ގަހެކެވެ. އެގަހަކީ، ގާތްގަނޑަކަށް 5400 އަހަރަށްވުރެ ގިނަ ދުވަސް ވެފައިވާ ގަހެކެވެ. އެހިސާބު މީހުން މިގަހަށް 'ގްރާން އަބުއޭލޯ' (ކާފަ) ގެ ނަމުން ނަން ދީފައި ވެއެވެ.
