ޝަންހާއި ކޯޕަރޭޝަން އޯގަނައިޒޭޝަން (އެސްސީއޯ) ގެ ސަމިޓްގައި އިންޑިއާގެ ބޮޑުވަޒީރު ނަރެންދްރަ މޮދީއާއި ޗައިނާގެ ރައީސް ޝީ ޖިންޕިންގ ބައްދަލުކުރައްވައި، ސަރަޙައްދީ ޓެރަރިޒަމްގެ މައްސަލައާ ގުޅޭގޮތުން މަޝްވަރާކުރައްވައިފިއެވެ. އިންޑިއާގެ ފޮރިން ސެކްރެޓަރީ ވިކްރަމް މިސްރީ ވިދާޅުވި ގޮތުގައި، މި ބައްދަލުވުމުގައި ބޮޑުވަޒީރު މޮދީ ޓެރަރިޒަމްގެ މައްސަލަ ފާހަގަކުރެއްވިއިރު، އެ މައްސަލައަކީ އިންޑިއާ އަދި ޗައިނާއަށް ކުރިމަތިވެފައިވާ މުހިންމު ގޮންޖެހުމެއްގެ ގޮތުގައި ފާހަގަކުރެއްވިއެވެ. މި މައްސަލައާ ގުޅޭގޮތުން ޗައިނާއިން އިންޑިއާގެ ކަންބޮޑުވުންތަކަށް އެއްބާރުލުން ދޭނެކަމުގެ ޔަގީންކަން ދީފައިވާކަމަށް މިސްރީ ވިދާޅުވިއެވެ.
މި ބައްދަލުވުމުގައި ދެ ޤައުމުގެ ދެމެދު ވައިގެ ދަތުރުފަތުރު އަލުން ފެށުމާ ގުޅޭގޮތުންވެސް މަޝްވަރާކުރެވުނެވެ. އިންޑިއާގެ ސިވިލް އޭވިއޭޝަން ގެ ވަފްދެއް ބެއިޖިންގއަށް ކުރި ދަތުރަކަށްފަހު، މިހާރު ވަނީ ވައިގެ ދަތުރުތައް ފެށުމުގެ ކަންކަން ނިންމުމުގެ މަރުހަލާގައި ކަމަށް މިސްރީ ފާހަގަކުރެއްވިއެވެ.
އެމެރިކާގެ ރައީސް ޓްރަމްޕް އިންޑިއާގެ އިމްޕޯޓް މުދަލަށް 50 އިންސައްތައަށް އަދި ޗައިނާގެ މުދަލަށް 30 އިންސައްތައިގެ ޓެރިފް ނެގުމަށް ނިންމާފައިވާ މައްސަލައާ ގުޅޭގޮތުންވެސް ދެ ލީޑަރުން މަޝްވަރާކުރެއްވިއެވެ. މީގެ އިތުރުން އިންޑިއާއިން ޗައިނާއަށް އެތެރެކުރާ މުދަލާއި ބޭރުކުރާ މުދަލުގެ ތަފާތު ކުޑަކުރުމުގެ މުހިންމުކަންވެސް ބޮޑުވަޒީރު މޮދީ ފާހަގަކުރެއްވިއެވެ.
މި ބައްދަލުވުމަކީ އިންޑިއާ-ޗައިނާ ގުޅުން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެއްގެ ގޮތުގައި ސިޔާސީ މާހިރުން ފާހަގަކުރައްވައެވެ. ސަރަޙައްދީ އަދި ބައިނަލްއަޤްވާމީ ގޮންޖެހުންތަކާ ކުރިމަތިލުމުގައި އެއްބާރުލުން އިތުރުކުރުމަށް ދެ ޤައުމުންވެސް އެއްބަސްވެފައިވާކަން މި ބައްދަލުވުމުން ފާހަގަކުރެވެއެވެ.
