އޮޅުކޮށްގެން ގެންގުޅުނު ދެ ކުއްތާއަށް މެކްޑޮނަލްޑްސްގެ ޗިކަން ނަގެޓްސް ކާންދެމުން ދިޔަ އިނގިރޭސި އަންހެން މީހާގެ އަތުގައި ކުއްތާ އަޅައިގެން އޭނާ މަރުވެއްޖެއެވެ. މިޝެލް ހެމްޕްސްޓެޑް ނަމަކަށް ބުނެފައިވާ އަންހެން މީހާ މަރުވެފައިވަނީ އޭނާގެ ގެންގުޅުނު ބޮޑު ކުއްތާ "ޓްރިގް" އޭނާގެ އަތުގައި ދަތްއެޅުމުން ލޭ ހިނގާ މައި ނާރު ބުރިވެގެންނެވެ. މިކަން ހިނގި އިރު އޭނާ ދިޔައީ އޭނާގެ އެޕާޓްމަންޓްގައި ދެ ކުއްތާއަށް ކާންދެމުންނެވެ.
އަންހެން މީހާގެ މަރުގެ ތަހުގީގު ކުރި އިސް މުހައްޤިޤު ލިންކަން ބްރޫކްސް ކިޔައިދިން ގޮތުގައި މި ހާދިސާ ހިނގާފައިވަނީ ކުޑަ ކުއްތާ "ބޫމް" އަށް ބޮޑު ކުއްތާ ހަމަލަ ދޭން އުޅުމުން އެކަން ހުއްޓުވުމަށް މަސައްކަތް ކުރުމުގެ ތެރޭގައެވެ. އޭނާ ސިފަ ކޮށްދިން ގޮތުގައި "ޓްރިގް" އަކީ ވަރުގަދަ ތޫނު ދަތްތަކެއް ހުރި ކުއްތާއެކެވެ.
އެސެކްސް ކައުންޓީގެ ސައުތުއެންޑްގައި ދިރިއުޅުނު މިޝެލް، ވަގުތުން ހަސްފަތާލަށް ގެން ދިޔައެވެ. ނަމަވެސް ލޭ މަނާ ނުވެގެން ޖެހިގެން އައި ދުވަހު އޭނާ ވަނީ މަރުވެފައެވެ.
މިޝެލްގެ ކުރީގެ ފިރިހެން ރައްޓެއްސަކު ތަހުގީގަށް ދީފައިވާ ބަޔާނުގައި ބުނެފައިވަނީ ހާދިސާ ހިނގި ދުވަހު މިޝެލް މެކްޑޮނަލްޑްސްއިން 20 ޗިކަން ނަގެޓްސް ގަތް ކަމަށެވެ. ސީސީޓީވީ ފުޓޭޖުން ފެންނަ ގޮތުގައި މިޝެލް ވަނީ ކުއްތާތަކަށް ނަގެޓްސް އުކާލަމުން ގޮސް ދެ ކުއްތާ ދެމެދުގެ ކޯޅުން މައިތިރި ކުރުމަށް މަސައްކަތް ކޮށްފައެވެ.
