އިންޑިއާގެ އުއްތަމަ ފަނޑިޔާރު ބީ.އާރް ގަވާއިއަށް ކޯޓު ތެރޭގައި ވަކީލަކު ދިން ހަމަލާ އިންޑިއާގެ ބޮޑުވަޒީރު ނަރެންދްރަ މޯދީ ވަނީ ހަރުކަށި އިބާރާތުން ކުށްވެރި ކުރައްވާފައެވެ. މި ހާދިސާއަކީ އިންޑިއާ ކޮންމެ ރައްޔިތަކު ކަންބޮޑުވާނެ ކަމެއް ކަމުގައި މޯދީ ވިދާޅުވެފައިވެއެވެ.
އުމުރުން 71 އަހަރުގެ ވަކީލަކު ވަނީ ސުޕްރީމް ކޯޓުގެ އަޑުއެހުމެއްގެ ތެރޭގައި އުއްތަމަ ފަނޑިޔާރާ ދިމާއަށް ބޫޓު ކިބައެއް އެއްލައި އިހާނެތިކޮށް ހިތައި ކޯޓުގެ ޙުރުމަތް ކަނޑާފައެވެ. ނަމަވެސް އުއްތަމަ ފަނޑިޔާރު ވަނީ ފަރުވާލެއް ނުބަހައްޓަވައި ސާބިތުކަމާއެކު ކޯޓުގެ މަސައްކަތް ކުރިއަށް ގެންދަވާފައެވެ.
މި ހާދިސާއާ ގުޅިގެން އެކްސް ގައި ޕޯސްޓެއް ކުރައްވައި، ބޮޑުވަޒީރު މޯދީ ވަނީ އުއްތަމަ ފަނޑިޔާރު ދެއްކެވި ކެތްތެރިކަމާއި ހިތްވަރުގަދަކަން ފާހަގަކުރައްވާފައެވެ. މިއީ އެ މަނިކުފާނުގެ އިންސާފުވެރިކަމާއި ޤާނޫނުއަސާސީގެ ރޫހު ދެމެހެއްޓެވުމުގެ އަޒުމުގެ ހެއްކެއް ކަމުގައި ވިދާޅުވިއެވެ.
އިންޑިއާގެ އުއްތަމަ ފަނޑިޔާރަށް ބަހުގެ ހަމަލަތައް އަމާޒުވާތާ ދުވަސް ކޮޅެއް ވެއްޖެއެވެ. މިކަމެއް ފެށުނީ މިއަދުގެ ޝަރީއަތުގެ މަޖިލީހުގައި އޮތް މަދްޔަ ޕްރަދޭޝްގެ ފައްޅިއަކާ ގުޅޭ މައްސަލައެއްގައެވެ. މީގެ ކުރީގެ އަޑު އެހުމެއްގައި އުއްތަމަ ފަނޑިޔާރު ވިދާޅުވީ " ވަޑައިގަންނަވާ! ވަޑައިގެން ބުދު ދޭވަތާ އަރިހުން ތިޔަ ވާހަކަ އައްސަވާ!" މި އިބާރާ މެދު ހިންދީން ވަނީ ވަރަށް ބޮޑަށް ރުޅި އައިސްފައެވެ. މިއަދު އުއްތަމަ ފަނޑިޔާރާ ދިމާއަށް ބޫޓު ކިބަ އުކާލަމުން ކިޝޯރު ބުނެފައި ވަނީ ދީނަށް ފުރައްސާރަ ކުރާތަން ބަލާކަށް ނުހުންނާނެ ކަމަށެވެ!
ދެކުނު އޭޝިއާގެ ގައުމުތަކަކީ ދުނިޔޭގެ އެންމެ ހަރުކަށި ކައްޓަރު ދީނީ މީހުން އުޅޭ ސަރަހައްދެވެ. އިންޑިއާގައި މިހާރު ނިޒާމީ ސިފައެއްގައި ޚާއްސަ ކޮށް އުއްތަރަ ޕްރަދޭޝްްގައި ސަރުކާރާއި ފުލުހުން އަދި ހިންދީ ދީނުގެ މީހުން މުސްލިމުންނަށް އަމާޒުކޮށް އެމީހުންގެ ގެތައް ބުލްޑޯޒަރު ޖަހައި ތޅަަމުން ދަނީ "އައި ލަވް މުހައްމަދު" ގެ ޝިއާރުތައް ގެންގުޅޭތީއެވެ. މައުލިދުއްނަބަވީގައި މި ފަދަ ޝިއާރެއް މީހަކު ގެންގުޅުމުން އޭނާ އާއި ބައިވެރިން ހައްޔަރުކޮށް ހިންދީން ފިޔަވަޅު އެޅުމުން މިހާރު މުސްލިމުންގެ މެދުގައި މި ޝިއާރު ވަނީ ފެޝަނަކަށް ވެފައެވެ. ކޮންމެ ދުވަހަކުވެސް މި ޝިއާރާ ގުޅިގެން ފުލުހުންގެ ކޮންމެވެސް ފުރައްސާރަ ކުރުމަކާ މުސްލިމުން ކުރިމަތިލާން ޖެހެއެވެ.
ކޯޓުގައި ހިނގި ހާދިސާއާ ގުޅިގެން ވަކީލާ މެދު ވަނީ ފިޔަވަޅު އަޅާފައެވެ. އޭނާއަށް އެއްވެސް ކޯޓެއްގައި އަދި އެއްވެސް ޓްރައިބިއުނަލެއްގައިވެސް ވަކާލާތު ނުކުރެވޭ ގޮތަށް ވަނީ ސަސްޕެންޑް ކޮށްފައެވެ. އަދި ބާ ކައުންސިލު އޮފް އިންޑިއާއިން ވަނީ މުއްދަތެއް ނެތް ގޮތަށް އޭނާގެ ލައިސަންސް ހިފަހައްޓާފައެވެ. އަދި ވަގުތުން އެއަށް އަމަލު ކުރުމަށް ދިއްލީ ބާކައުންސިލަށް ވަނީ އަންގާފައެވެ. ޝަރިއަތް ނިމުމާއެކު ވަކީލު ކިޝޯރު ވަނީ ހައްޔަރުކޮށްފައެވެ.
