އެފްރިކާގެ އެންމެ އަގުހުރި މަޢުދަން ވަސީލަތްތަކުގެ މައްޗަށް ޗައިނާއިން ހަލުވިކަމާއެކު ކޮންޓްރޯލް ފުޅާކުރަމުން އަންނައިރު، މިއީ އިގްތިސާދީ އިސްތިއުމާރީގެ އާ ނިޒާމެއް އުފެދިދާނެ ކަމުގެ ބިރު އުފެދިފައިވާ މައްސަލައެކެވެ. ދުނިޔޭގެ އެކި ކަންކޮޅުތަކުން މިކަމާ ގުޅިގެން ކަންބޮޑުވުންތައް އިތުރުވެފައިވެއެވެ.
ކޮންގޯގެ ކޯބަލްޓުން ފެށިގެން ޒިމްބާބުވޭ އާއި ނަމީބިއާގައި ލިތިއަމް އާއި ހަމައަށް، ޗައިނާގެ ކުންފުނިތަކުން މިހާރު ދަނީ އެދާއިރާތަކުގައި ވެރިކަން ކުރަމުންނެވެ. ސާފު ހަކަތައިގެ ޓެކްނޮލޮޖީތަކަށް ބޭނުންވާ މުހިންމު މަޢުދަންތައް މިތަންތަނުން މައިން ކޮށް ޕްރޮސެސް ކުރަނީ ޗައިނާއިންނެވެ.
މިގޮތުން، ދުނިޔޭގައި އުފައްދާ %60 މައުދަން ކަމަށްވާ ކޯބަލްޓް، ލިތިއަމް، އަދި މަދުން ނޫނީ ނުފެންނަ ނާދިރު މައުދަންތައް ޕްރޮސެސްކުރުމުގެ %85 ކޮންޓްރޯލް ކުރަނީ ޗައިނާއިންނެވެ.
މިދިޔަ އަހަރުތަކުގައި ޗައިނާއިން ވަނީ އެފްރިކާއަށް ކުރާ އިންވެސްޓްމަންޓް އެތައް ގިނައަށް އިތުރުކޮށްފައެވެ. 2023 ވަނަ އަހަރުން ފެށިގެން ޗައިނާގެ ކުންފުނިތަކުން ވަނީ އެފްރިކާގެ މައިނިން މަޝްރޫއުތަކަށް 8 ބިލިއަން ޑޮލަރަށް ވުރެ ގިނައިން އިންވެސްޓްކޮށްފައެވެ. މި ޑީލްތައް ގިނަ ފަހަރަށް ބިނާވެފައިވަނީ މައުދަންގެ ބަދަލުގައި އުމްރާނީ ތަރައްގީއަށް އިންވެސްޓު ކުރާ މޮޑެލްއެއްގެ މައްޗަށެވެ. އެގޮތުން ދިގު މުއްދަތަށް މައިން ކުރުމުގެ ހައްގުތަކުގެ ބަދަލުގައި ޗައިނާއިން މަގުތަކާއި ހޮސްޕިޓަލްތައް ބިނާ ކޮށްދެއެވެ.
ނަމަވެސް މި އިންވެސްޓްމަންޓްތަކާ ގުޅިގެން ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ނަމީބިއާ އާއި ކޮންގޯ ފަދަ ގައުމުތަކުގައި ޗައިނާގެ ކުންފުނިތަކުގެ މައްޗަށް ކޮރަޕްޝަނާއި ތިމާވެއްޓަށް ގެއްލުން ދިނުމާއި، މަސައްކަތްތެރިންނަށް އަނިޔާކުރުމުގެ ތުހުމަތުތަކެއް ކުރެވިފައި ވެއެވެ. މިކަންކަމުގެ ސަބަބުން އެފްރިކާގެ ގައުމުތަކަށް ދިގު މުއްދަތުގެ ނޭދެވޭ އަސަރުތަކެއް ކުރާނެ ކަމަށް ބައިނަލްއަޤްވާމީ ފަރާތްތަކުން އިންޒާރު ދެއެވެ.
