މިޞްރަށް ދަތުރުކުރާ ދިވެހިންނަށް އެޤައުމަށް އެތެރެވުމުގެ ކަންކަން ލުއިފަސޭހަކޮށްދިނުމުގެ ގޮތުން، ކައިރޯ އިންޓަރނޭޝަނަލް އެއާޕޯޓުގައި އައު ޑިޖިޓަލް "ވިޒިޓަރ ވީޒާ އޮން އަރައިވަލް" ނިޒާމެއް ތަޢާރަފުކުރުމަށް މިޞްރުގެ ސަރުކާރުން ތައްޔާރުވެއްޖެއެވެ. 2026 ވަނަ އަހަރުގެ އޯގަސްޓް މަހު ކައިރޯ އެއާޕޯޓުގެ ހުރިހާ ޓާމިނަލްތަކެއްގައި ޚިދުމަތް ދޭން ފަށާ މި ނިޒާމަކީ ކިއުތައް ކުޑަކޮށް، އެއާޕޯޓުގެ ތޮއްޖެހުން ކުޑަކުރުމަށް ޤާއިމުކުރާ ކިއު.އާރު ކޯޑު އެކުލެވޭ ނިޒާމެކެވެ.
މިޞްރުގެ ޓޫރިޒަމް އެންޑް އެންޓިކްވިޓީސް މިނިސްޓަރު ޝެރީފް ފަތުހީ ވިދާޅުވި ގޮތުގައި، މިއީ އެޤައުމުގެ ބޯޑަރުތަކުން އެތެރެވުމުގެ ނިޒާމު ތަރައްޤީކުރުމަށް ކުރެވޭ މަސައްކަތުގެ ބައެކެވެ. މި އައު ނިޒާމާއެކު، ކުރިން ޕާސްޕޯޓުގައި ޖަހަމުން އައި ސްޓިކާ ވީޒާގެ ބަދަލުގައި، ދަތުރުވެރިންނަށް ގައުމަށް އެތެރެވުމުގެ 48 ގަޑިއިރު ކުރިން އޮންލައިންކޮށް ޑިޖިޓަލް ކިއު.އާރު ކޯޑު ހޯދޭނެއެވެ.
ޤަވާޢިދުތަކާއި އުޞޫލުތައް
- އުޅެވޭނެ މުއްދަތު: މިޞްރަށް އެތެރެވާ ދުވަހުން ފެށިގެން ގިނަވެގެން 30 ދުވަސް.
- ވީޒާ ފީ: 25 އެމެރިކާ ޑޮލަރު (މި ފީ ދައްކަންޖެހޭނީ އޮންލައިންކޮށް، އެޕްލިކޭޝަން ނުވަތަ އެއާޕޯޓުގެ ސެލްފް-ސާވިސް ކިއޮސްކްތައް މެދުވެރިކޮށެވެ).
- ޕާސްޕޯޓުގެ މުއްދަތު: މިޞްރަށް އެތެރެވާ ދުވަހުން ފެށިގެން މަދުވެގެން 6 މަސްދުވަހުގެ މުއްދަތު އޮންނަންވާނެއެވެ.
- ދަތުރުގެ ބޭނުން: އޮން-އަރައިވަލް ވީޒާ ދޫކުރެވޭނީ ހަމައެކަނި ފަތުރުވެރިކަމުގެ ބޭނުމުގައެވެ. ވަޒީފާ އަދާކުރުމަށް، ތަޢުލީމު ހާސިލުކުރުމަށް ނުވަތަ ދިގު މުއްދަތަކަށް އުޅުމަށް އެމްބަސީ މެދުވެރިކޮށް ކުރިއާލާ ވީޒާ ހޯދަންޖެހޭނެއެވެ.
- އެޕްލިކޭޝަން ހުށަހެޅުން: ދަތުރުކުރުމުގެ 48 ގަޑިއިރު ކުރިން ރަސްމީ ވެބްސައިޓް ނުވަތަ މޮބައިލް އެޕްލިކޭޝަން މެދުވެރިކޮށް މަޢުލޫމާތު ހުށަހެޅުން.
- ފީ ދެއްކުން: ވީޒާ ފީއާއި ޚިދުމަތުގެ ފީ އޮންލައިންކޮށް ކާޑުން ދެއްކުން.
- އެތެރެވުން: ކައިރޯ އެއާޕޯޓަށް ފޭބުމަށްފަހު، ލިބިފައިވާ ކިޔުއާރު ކޯޑު އިމިގްރޭޝަން އޮފިސަރަށް ދެއްކުމުން، ކިއުގައި މަޑުނުކޮށް އަވަހަށް އެތެރެވުން.
މިޞްރުގެ އަމާޒަކީ 2031 ވަނަ އަހަރާ ހަމައަށް އަހަރަކު 30 މިލިއަން ފަތުރުވެރިންނަށް ޚިދުމަތްދިނުން ކަމަށްވާތީ، މިއީ އެއާޕޯޓުތަކުގެ ޚިދުމަތްތައް ޒަމާނީ ކުރުމަށް ކުރެވޭ މުހިންމު މަސައްކަތެކެވެ.
