ރައްޔިތުންގެ މަޖިލީހުގެ މިއަދުގެ ޖަލްސާގައި، ނައިބު ރައީސް އަހުމަދު ސަލީމް (ރެޑްވޭވް ސަލީމް) މެންބަރުންގެ ކިބައިން އެދިވަޑައިގަތީ ބިލުތަކަށް "އިލްމީ ބަހުސް" ކުރެއްވުމަށެވެ. މިއީ ފެންނަ ފެނުމަށް ރަނގަޅު އެދުމެއް ކަމަށް ހީވިނަމަވެސް، މަޖިލީހުގެ މިއަދުގެ ހަގީގީ މަންޒަރަކީ، ޒިންމާދާރުކަމާއި ބަހުސްގެ ފެންވަރުގެ މައްސަލަތައް ފެންމަތިވެފައިވާ ދަނޑިވަޅެއްކަމުގައި ވުމެވެ.
މިއަދުގެ ޖަލްސާގައި ފެނިގެންދިޔައީ ހަމައެކަނި ބަހުސްގެ ފެންވަރުގެ ވާހަކައެއް ނޫނެވެ؛ ޖަލްސާގެ ތެރޭގައި ހިނގި ހޫނު ޒުވާބަކާ ގުޅިގެން މެންބަރަކު މަޖިލީހުން ނެރެންޖެހުނު ހިސާބަށް ކަންކަން ދިޔުމުން، މަޖިލީހުގެ ރިޔާސަތުން ވަނީ އެކަމާ މެދު ކަންބޮޑުވުން ފާޅުކޮށްފައެވެ.
މަޖިލީހުގެ ނައިބު ރައީސްގެ މި އެދިވަޑައިގަތުން އައިސްފައި މިވަނީ، އިއްޔެ އޭނާ ދެއްކެވި ވާހަކަތަކަކާ ގުޅިގެން މަޖިލީހުގެ ދައުރާމެދު އުފެދިފައިވާ ސުވާލުތަކުގެ ތެރޭގައެވެ. ސަލީމް ހާމަކުރެއްވި ގޮތުގައި، ރާއްޖޭގެ މަޖިލީހުގެ އުމުރު 100 އަހަރާ ގާތްވެފައިވާއިރު، ގައުމަށް ބޭނުންވާ މައިގަނޑު ގާނޫނުތައް ހަދައި ނިމިއްޖެއެވެ.
ނަމަވެސް މިއީ ދެކޮޅު ނުޖެހޭ ވާހަކައެކެވެ. ޑިމޮކްރެޓިކް ނިޒާމެއްގައި މަޖިލީހަކީ ހަމައެކަނި ގާނޫނުތައް އުފައްދާ ފެކްޓްރީއެއް ނޫނެވެ. މަޖިލީހުގައި ބަހުސްކުރާނެ ބިލުތަކެއް ނެތޭ ބުނުމަކީ، މެންބަރުންގެ ފާރަވެރިވުމުގެ ޒިންމާއިން ރެކެވޭނެ ކަމެއް ނޫނެވެ.
މިއަދުގެ ޖަލްސާގައި ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) މަޖިލީހުން ނެރުނީ، ގަވާއިދާ ހޚިލާފުވިކަމަށް ބުނެއެވެ. މި ހާދިސާއަށް އިޝާރާތްކުރައްވައި ސަލީމް ވިދާޅުވީ، މަޖިލީހަކީ "ބަކަރިކޮށްޓެއް ނުވަތަ ޖަނަވާރު ކޮށްޓެއް" ކަމަށް އާންމުން ސިފަކުރާ ކަމަށާއި، ރިޔާސަތުގައި އިންނަވަނިކޮށް އެފަދަ ހާލަތަކަށް މަޖިލިސް ވެއްޓުނަ ނުދެއްވާނެ ކަމަށެވެ.
މެންބަރުންގެ ފަރާތުން ފެންނަ މިފަދަ އަމަލުތަކަކީ، ސަލީމް ގޮވާލައްވާ "އިލްމީ ބަހުސް" ތަކަށް އޮތް ބޮޑު ގޮންޖެހުމެކެވެ. މަޖިލީހުގެ ތެރޭގައި އިހުތިރާމު ކުޑަވުމަކީ، ގައުމީ މަސައްކަތްތަކަށް އަރައިގަނެވޭ ބޮޑު ހުރަހެކެވެ.
ސަލީމް މެންބަރުންނަށް ގޮވާލެއްވީ އިލްމީ ބަހުސްތަކެއް ކުރުމަށެވެ. އެހެންނަމަވެސް، ހަގީގީ އިލްމީ ބަހުސަކަށް ވާނީ:
- ދައުލަތުގެ މާލީ ހާލަތު: ފެނަކަ ފަދަ ކުންފުނިތަކުގެ މާލީ ހާލަތު ބަލައި، ޖަވާބުދާރީ ކުރުވުން.
- އިދާރީ ހިންގުން: ސަރުކާރުގެ ވުޒާރާތަކާއި އޮތޯރިޓީތަކުގެ ހިންގުން ހަރުދަނާކުރުމަށް ފާރަވެރިވުން.
މަޖިލީހުގެ 100 ވަނަ އަހަރު ގާތްވަމުންދާއިރު، މުއައްސަސާގެ އަގު ހިފެހެއްޓޭނީ ބިލުތަކެއް ފާސްކޮށްގެން އެކަނި ނޫނެވެ. ރިޔާސަތުން މެންބަރުންނަށް ނަސޭހަތް ދެއްވާއިރު، މަޖިލީހުގެ ޖަލްސާތަކަކީ އަރައިރުންވާ ތަނެއްގެ ބަދަލުގައި، ގައުމީ މައްސަލަތަކަށް ހައްލު ހޯދާ އިލްމީ މަރުކަޒަކަށް ހެދުމުގެ ޒިންމާއާ ދިމާއަށް މެމްބަރުން ގެންދެވުމުގެ ޒިންމާ އެންމެ ބޮޑަށް އޮތީ ރިޔާސަތަށެވެ. މަޖިލީހުގެ އަލިކަން ފަނޑުވެގެން ދަނީ މަސައްކަތް ނެތިގެން ނޫނެވެ؛ މަސައްކަތް ކުރަންވީ ދިމާއަށް ބަލަން ނޭނގިގެންނެވެ.
