ރައްޔިތުންގެ މަޖިލީހުގެ ޖުޑީޝަރީ ކޮމިޓީން ދެ ފަނޑިޔާރުން ވަކި ކުރުމަށް މިއަދު ނިންމައިފިއެވެ. ސުޕްރީމް ކޯޓުގެ ދެ ފަނޑިޔާރުން ވަކިކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމި ނިންމުމަކީ ރަނގަޅު ނިންމުމެއް ކަމަށް ކޮމިޓީން ދެކެއެވެ. މި ނިންމުން ދެން ދާނީ މަޖިލީހުގެ ތަޅުމަށެވެ.
މި މައްސަލައިގެ ފެށުން އައީ މިދިޔަ ފެބްރުއަރީ 26 ވަނަ ދުވަހު ސުޕްރީމް ކޯޓުގެ ތިން ފަނޑިޔާރުން ކުއްލިގޮތަކަށް ސަސްޕެންޑް ކުރުމާ ގުޅިގެންނެވެ. މީގެ ތެރެއިން ދެ ފަނޑިޔާރުންނާ ގުޅޭގޮތުން ޖޭއެސްސީން ބަލަމުންދިޔަ މައްސަލައަކީ ވަކި ދެ ހާދިސާއަކާ ގުޅުންހުރި މައްސަލައެކެވެ.
ފުރަތަމަ މައްސަލައަކީ ފަނޑިޔާރު އަޒްމިރާލްދާގެ ފިރިކަލުން ބަންދުން ދޫކޮށްލުމަށް ކްރިމިނަލް ކޯޓުގެ ފަނޑިޔާރަކަށް ގުޅުއްވައި ނުފޫޒު ފޯރުވި ކަމަށް ބުނާ ތުހުމަތެވެ. ދެވަނަ މައްސަލައަކީ ހައިކޯޓުގެ އެސިސްޓެންޓް ރެޖިސްޓްރާ ހުސައިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް، އެ ކޯޓުގެ ކުރީގެ ފަނޑިޔާރު ހުސްނުއްސުއޫދު ހޮއްލެވިކަމަށް ބުނާ މަޖިލީހުގައި ފަނޑިޔާރު އަޒްމިރާލްދާ އާއި ފަނޑިޔާރު މަހާޒް ތިއްބެވި ކަމަށް ބުނާ މައްސަލައެކެވެ.
މި މައްސަލަތައް ތަހުގީގުކުރުމަށްފަހު، ޖޭއެސްސީގެ ތަހުގީގު ކޮމެޓީން ނިންމީ އެ ދެ ފަނޑިޔާރުން ވަކިކުރުމަށެވެ. މި ނިންމުން ޖޭއެސްސީން ވަނީ ފާސްކޮށްފައެވެ.
މި ދެ ފަނޑިޔާރުންގެ އިތުރުން ފަނޑިޔާރު ހުސްނުއްސުއޫދު ވެސް އޭރު ސަސްޕެންޑްކުރެވުނެވެ. ނަމަވެސް ސުއޫދު ވަނީ ފަހުން މަގާމުން އިސްތިއުފާ ދެއްވާފައެވެ.
މި ފަނޑިޔާރުން ސަސްޕެންޑްކުރެވުނު ވަގުތު ސުޕްރީމް ކޯޓުން ވަނީ މަޖިލީހުގެ މެމްބަރުން ޕާޓީ ބަދަލުކޮށްފިނަމަ މެމްބަރުކަމުގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލް ކުރުމުގެ މައްސަލައިގެ އަޑުއެހުމެއް ތާވަލްކޮށްފައެވެ. އެހެންވެ ފަނޑިޔާރުންނާ މެދު އަޅާ ފިޔަވަޅުތަކާ މެދު ސުއާލު އުފެދުނެވެ.
މަޖިލީހުގެ ޖުޑީޝަރީ ކޮމިޓީން މި މައްސަލަ ބެލީ ސިއްރު ޖަލްސާތަކެއްގައެވެ. ދެން މި މައްސަލަ ދާނީ މަޖިލީހުގެ ތަޅުމަށެވެ. ކޮމިޓީގެ ރިޕޯޓު މެމްބަރުންނަށް ފޮނުވުމަށްފަހު، މަޖިލީހުގެ ޖަލްސާއެއްގައި މި މައްސަލައަށް ބަހުސްކުރެވޭނެއެވެ. ފަނޑިޔާރުން ވަކިކުރުމާމެދު ގޮތެއް ނިންމާނީ މަޖިލީހުގެ ތަޅުމުގައި ވޯޓު ނަގައިގެންނެވެ. މަޖިލީހުގެ ތިން ބައިކުޅަ ދެ ބައި މެމްބަރުންގެ ވޯޓުން އެކަން ފާސްވެގެންނެވެ.
