ޗައިނާއިން ދަގަނޑާއި ކެމިކަލް ދާއިރާގައި އުފައްދާ އުފެއްދުން އިތުރު ވުމުގެ ސަބަބުން ޖަޕާނުގެ އެތެރޭގެ މާކެޓަށް އެތަކެތި ހެޔޮ އަގުގައި ވިއްކަމުން ގެންދާތީ އެންޓި-ޑަމްޕިންގ ޓެރިފްގެ ދާއިރާ ފުޅާކުރުމަށް ޖަޕާނުން ނިންމައިފިއެވެ. މި ފިޔަވަޅު އަޅާފައި ވަނީ ޗައިނާގެ އުފެއްދުންތަކުގެ ޕްރެޝަރުން އެތެރޭގެ ސިނާއަތްތައް ރައްކާތެރި ކުރުމަށެވެ.
މި އާ ފިޔަވަޅުތަކުގެ ދަށުން، އެންޓި-ޑަމްޕިންގ ޑިއުޓީ ނަގާނީ ހަމައެކަނި ޗައިނާއިން ސީދާ އިމްޕޯޓް ކުރާ މުދަލަށް އެކަންޏެއް ނޫނެވެ. ނަމަވެސް ތިންވަނަ ގައުމެއް މެދުވެރިކޮށް ޖަޕާނަށް ރީރޫޓްކުރާ މުދަލަށްވެސް މި ޑިއުޓީ ނެގުމަށް ވަނީ ހަމަޖެހިފައެވެ. މިގޮތަށް ޓެރިފް ނަގާ ދާއިރާ ފުޅާކުރުމުގެ މައިގަނޑު މަޤްޞަދަކީ ޗައިނާގެ އުފެއްދުންތައް ނުސީދާ ގޮތެއްގައި ޖަޕާނަށް އިމްޕޯޓު ވިޔަ ނުދިނުމަށާއި އެކަމަށް ހުރި ލޫޕްހޯލްތައް ބަންދުކޮށް، ވިޔަފާރިތައް ރައްކާތެރި ކުރުމަށެވެ.
ޖަޕާނުގެ ދަގަނޑާއި ކެމިކަލް އުފެއްދުމުގެ ދާއިރާގެ ސިނާއަތުގެ ލީޑަރުން ވަނީ ޗައިނާގެ އަގުހެޔޮ އެކްސްޕޯޓްތަކުގެ ސަބަބުން އެފަރާތްތަކަށް ވާދަވެރިކަމުގައި ފިއްތުން ބޮޑުވަމުންދާ ކަމަށް ބުނެ ޝަކުވާ ކޮށްފައެވެ. އަދި، ކޮންޓްރޯލްތައް ހަރުކަށި ކުރުމަށް އެފަރާތްތަކުން ގޮވާލަމުންދާތާ އެތައް ދުވަހެއް ވެއްޖެއެވެ.
ޖަޕާންގެ މިނިސްޓްރީ އޮފް އިކޮނޮމީ، ޓްރޭޑް އެންޑް އިންޑަސްޓްރީ (މެޓީއައި) އިން ވަނީ ވިޔަފާރިވެރިންގެ މި ކަންބޮޑުވުންތައް ގަބޫލުކޮށް، ޖަޕާނުގެ ސިނާއީ ވާދަވެރިކަން ރައްކާތެރި ކުރަން ޖެހޭ ކަން ފާހަގަކޮށްފައެވެ.
މި ފިޔަވަޅުތައް އަޅާފައިވަނީ ޗައިނާގެ އުފެއްދުންތައް ދުނިޔޭގެ ޑިމާންޑަށްވުރެ އިތުރުވަމުންދާއިރު، އިތުރވާ އުފެއްދުންތަކަށް ޖާގަހޯދުމަށް ކުރަމުންދާ މަސައްކަތާ ހެދިއެވެ. ޖަޕާނުގެ އެންޓި-ޑަމްޕިންގ މުދަލުގެ ކަންކަން ރެކޯޑް މިންވަރަކަށް އިތުރު ވެފައިވާ ކަން ތަފާސްހިސާބުން ދައްކައެވެ. ތަހުލީލު ކުރާ ފަރާތްތަކުން އިންޒާރު ދެނީ، ޖަޕާނުން ޗައިނާއާ ދެކޮޅަށް އިސްލާހީ ފިޔަވަޅުތަކެއް ނާޅައިފިނަމަ، ޖަޕާނުގެ އެތެރޭގެ ސިނާއީ ފަރާތްތަކަށް މާކެޓް ހިއްސާ ގެއްލި ފައިދާ ދިގު މުއްދަތަކަށް ހީނަރުވެގެން ދިއުމާ ކުރިމަތިލާން ޖެހިދާނެ ކަމަށެވެ.
