ދެކުނު ޗައިނާ ކަނޑުގެ މިލްކުވެރިކަމާ މެދު ދެބަސްވުން އުފެދިފައިވާ ސަރަހައްދުތަކުގައި ހިންގާ ހަރަކާތްތަކާ ގުޅިގެން ޗައިނާ އާއި ފިލިޕީންސުން އާދީއްތަ ދުވަހު އަލުން އެއްބަޔަކު އަނެއް ބަޔަކަށް ބޮޑެތި ތުހުމަތުތަކެއް ކޮށްފިއެވެ. މިއީ އެ ސަރަހައްދުގެ މަސްރަހު ނުތަނަވަސްވެފައިވާ ދަނޑިވަޅެއްގައި އިތުރުވި ޕްރެޝަރެކެވެ.
ޗައިނާގެ ކޯސްޓްގާޑުން ބުނި ގޮތުގައި، ސްޕްރެޓްލީ އައިލެންޑްސް ކައިރީގައި އޮންނަ، މީހުން ދިރިނޫޅޭ ސޭންޑީ ކޭ އަށް ފިލިޕީންސްގެ ފަސް މީހަކު ވަނީ ފައިބާފައެވެ. ބެއިޖިންގް އިން މި އަމަލު ސިފަކޮށްފައިވަނީ ގާނޫނާ ޚިލާފު އަމަލެއްގެ ގޮތުގައެވެ. ނަމަވެސް، މިކަމާ ގުޅިގެން ވަގުތުން އަޅާނެ ފިޔަވަޅެއް ޗައިނާއިން ހާމަކޮށްފައެއް ނުވެއެވެ.
މި ތުހުމަތުތައް ދޮގުކުރަމުން ފިލިޕީންސުން ބުނީ، ޗައިނާގެ ބަޔަކު އެ ސަރަހައްދުގައި ދިދައެއް ޖަހާފައިވާ ކަމުގެ ރިޕޯޓް ލިބުމާ ގުޅިގެން މިދިޔަ ހަފުތާގައި އެ ގައުމުގެ ކޯސްޓްގާޑު އެ ސަރަހައްދަށް ފޮނުވި ކަމަށެވެ. ފިލިޕީންސް ކޯސްޓްގާޑުގެ ތަރުޖަމާނު ތުހުމަތު ކުރެއްވި ގޮތުގައި ޗައިނާގެ ހަތަރު އުޅަނދަކުން ދަނީ ފިލިޕީންސްގެ ކަނޑުގެ ސަރަހައްދުގައި ގާނޫނާ ޚިލާފަށް ދިރާސާތައް ކުރަމުންނެވެ. އަދި ބޭނުންވެއްޖެ ނަމަ އެ އުޅަނދުތައް ފޮނުވާލުމަށް މަތިންދާބޯޓާއި އުޅަނދުތައް ފޮނުވާނެ ކަމަށްވެސް އޭނާ ވިދާޅުވިއެވެ.
ސޭންޑީ ކޭ އަކީ ތީޓޫ އައިލެންޑް ކައިރީގައި އޮންނަ ކުޑަ ނަމަވެސް ސްޓްރެޓީޖިކް ގޮތުން މުހިންމު ސަރަހައްދެކެވެ. ފިލިޕީންސުން ގަބޫލުކުރާ ގޮތުގައި އެއީ ކަލާޔާން އައިލެންޑް ގްރޫޕްގެ ބައެކެވެ. ނަމަވެސް ޗައިނާއިން ދަނީ އެތަނަކީ ޗައިނާއިން ކަނޑައަޅާފައިވާ "ނައިން-ޑޭޝް ލައިން" ގެ އިމަށް ރިއާޔަތްކޮށް އެއީ ޗައިނާގެ ތަނެއް ކަމަށް ބުނަމުންނެވެ. 2016 ވަނަ އަހަރު ބައިނަލްއަގުވާމީ ޓްރައިބިއުނަލަކުން ވަނީ ޗައިނާގެ މި ދައުވާތަކުގައި ގާނޫނީ ބިންގަލެއް ނެތް ކަމަށް ނިންމާފައެވެ. އެހެންނަމަވެސް ބެއިޖިންގް އިން އެ ނިންމުން ގަބޫލެއް ނުކުރެއެވެ.
ވޭތުވެދިޔަ އަހަރު ދެ ގައުމުގެ ގުޅުން ވަނީ ވަރަށް ބޮޑަށް ގޯސްވެފައެވެ. ފިލިޕީންސްގެ އުޅަނދުތަކަށް ހުރަސް އެޅުމާއި، ފެން ބަޑި ބޭނުންކުރުމާއި، ކަނޑުމަތީގައި އެކްސިޑެންޓްތައް ހިނގަން މެދުވެރިވާ ފަދަ އަމަލުތައް ޗައިނާގެ އުޅަނދުތަކުން ކުރަމުންދާ ކަމަށް މެނީލާއިން ތުހުމަތުކޮށްފައިވެއެވެ. މީގެ އިތުރުން، ޗައިނާގެ އުޅަނދުތަކުން ފަރުތަކުގެ ކައިރީގައި ސަޔަނައިޑް ބޭނުންކުރާ ކަމުގެ ތުހުމަތުވެސް ފިލިޕީންސުން ވަނީ ކޮށްފައެވެ.
މި މައްސަލައިގައި ދެ ގައުމުގެ ފޮރިން މިނިސްޓްރީން ރަސްމީކޮށް ވަކި އެއްޗެއް ބުނެފައި ނުވެއެވެ.
