އެމެރިކާގައި ހަ އަހަރު ދުވަސް ހޭދަކުރުމަށްފަހު، ސަސެކްސްގެ ޑިއުކް ޕްރިންސް ހެރީއާއި މޭގަން އެބޭފުޅުންގެ ދަރިކަލުންނާއެކު އިނގިރޭސިވިލާތަށް އެނބުރި ވަޑައިގެންފި އެވެ.
އެމެރިކާގެ ކެލިފޯނިޔާއިން ފުރައިގެން އަމިއްލަ ފްލައިޓެއްގައި ދަތުރުކުރެއްވުމަށްފަހު، ހެރީއާއި މޭގަންގެ އާއިލާ އިންގްލޭންޑްގެ ބާމިންގްހަމް އެއާޕޯޓަށް ފައިބާފައިވަނީ ބުދަ ދުވަހުގެ މެންދުރުގެ ވަގުތެއްގައެވެ. އިނގިރޭސި މީޑިއާ ރިޕޯޓުކުރާ ގޮތުގައި، ޝާހީ އާއިލާގެ ރަސްމީ މަސްއޫލިއްޔަތުތަކުން އެއްފަރާތްވެވަޑައިގެންފައިވާ މިއާއިލާ ދެން ދިރިއުޅުއްވާނީ ލަންޑަންގެ ބޭރުގައިވާ ކޮޓްސްވޯލްޑްސް ސަރަހައްދުގެ އަމިއްލަ ގޭގައެވެ.
އާއިލާއާ އަރިސް މަސްދަރަކުން އިނގިރޭސި ނޫހަކަށް މައުލޫމާތު ދެމުން ބުނެފައިވަނީ، މިއީ ކުރު ދަތުރެއް ނޫން ކަމަށާއި، އާއިލާއިން އިނގިރޭސިވިލާތުގައި ދިގު މުއްދަތަކަށް ތިބުމަށް ނިންމާފައިވާ ކަމަށެވެ. އެގޮތުން، ދެ ބޭފުޅުންގެ ދަރިކަލުން އާޗީއާއި ދަރިކަނބަލުން ލިލިބެޓް، ކުރިއަށް އޮތް ހަފުތާގައި ފަށާ އާ ދިރާސީ އަހަރާއެކު އިނގިރޭސިވިލާތުގެ ސްކޫލަކަށް ވަނުމަށް މިހާރު ވަނީ ހަމަޖެހިފައެވެ.
ހެރީއާއި މޭގަން އިނގިރޭސިވިލާތަށް އެނބުރި ވަޑައިގަންނަވާކަން ރަސްގެފާނު ޗާލްސް ތިންވަނައަށް އަންގަވާފައިވަނީ މިމަހުގެ ކުރީކޮޅުގައެވެ. އަދި ވޭތުވެދިޔަ މަހު ހެރީއާއި މޭގަން ވަނީ އެބޭފުޅުންގެ ދަރިންނާއެކު ހައިގްރޯވްގައި ރަސްގެފާނާ ބައްދަލުކުރައްވާފައެވެ. މީގެއިތުރުން، ލަންޑަންގެ ޝާހީ ތަޚުތުގެ ވާރުތަވެރިޔާ، ޕްރިންސް އޮފް ވޭލްސް ވިލިއަމްއާއި ކޭޓް މިޑްލްޓަންއަށްވެސް މި ނިންމެވުމުގެ މައުލޫމާތު ވަނީ ހިއްސާކުރައްވާފައެވެ.
މި އެނބުރިވަޑައިގަތުމާއެކު، އިނގިރޭސިވިލާތުގައި ހެރީއަށް ދެވޭ ސެކިއުރިޓީ ރައްކާތެރިކަމާ ގުޅޭގޮތުން އަލުން ބަހުސްތައް ވަނީ އުފެދިފައެވެ. ޝާހީ މަސްއޫލިއްޔަތުތަކުން އެކަހެރިވެވަޑައިގަތުމާ ގުޅިގެން، ދައުލަތުގެ ޚަރަދުގައި ދެވޭ ސެކިއުރިޓީ ކުޑަކުރުމަށް އިނގިރޭސި ސަރުކާރުން ނިންމި ނިންމުމާ ދެކޮޅަށް ހެރީ ހުށަހެޅުއްވި ގާނޫނީ މައްސަލަ ފާއިތުވި އަހަރު ވަނީ ނާކާމިޔާބުވެފައެވެ.
ހެރީއާއި މޭގަން 2020 ވަނަ އަހަރުގެ ކުރީކޮޅު ޝާހީ އާއިލާގެ އިސް ދައުރު ދޫކޮށްލެއްވުމަށްފަހު އެމެރިކާއަށް ދިރިއުޅުން ބަދަލުކުރެއްވި ނަމަވެސް، މިފަހަރު އެނބުރި ވަޑައިގެންނެވީ ސިޔާސީ ނުވަތަ ޝާހީ ރަސްމީ ހައިސިއްޔަތަކުން ނޫނެވެ. އެބޭފުޅުންގެ އަމާޒަކީ އާންމު ރައްޔިތުންގެ ގޮތުގައި އާއިލީ ދިރިއުޅުމެއް އާރާސްތުކުރުމެވެ.
