15 ގަރުނަށްވުރެ ގިނަ ދުވަހުގެ ތާރީޚެއް އޮތް ކޮފީއަކީ އިންސާނީ ޙަޟާރަތުގައި ވަރަށް މުހިންމު މަޤާމެއް ލިބިފައިވާ ބުއިމެކެވެ. 17 އަދި 18 ވަނަ ގަރުނުގައި ޒަމާނީ ބިންގާ އެޅުމުގައި ކޮފީ ވަނީ މުހިންމު ދައުރެއް އަދާކޮށްފައެވެ. ކޮފީގެ މައިގަނޑު މާއްދާއަކީ ކެފީންއެވެ. މިއަދު މިއީ ދުނިޔޭގައި އެންމެ ގިނައިން ބޭނުންކުރެވޭ ސްޓިމިއުލަންޓެވެ. އަދި މީހުންގެ ވިސްނުމާއި އިހްސާސްތަކަށް ވަރަށް ބޮޑު އަސަރެއް ކުރާ ބުއިމެއްވެސް މެއެވެ. އިންޓަނޭޝަނަލް ކޮފީ އޯގަނައިޒޭޝަނުން 2014 ވަނަ އަހަރު ފާސްކޮށްގެން 2015 ގައި އިޓަލީގެ މިލާނުގައި ރަސްމީކޮށް ފެށި ދުނިޔޭގެ ކޮފީގެ ދުވަސް ފާހަގަކުރަނީ ކޮންމެ އަހަރެއްގެ އޮކްޓޯބަރު 1 ވަނަ ދުވަހުއެވެ.
ކޮފީ ބުއިން ތައާރަފްވީީ އިތިއޯޕިއާގެ އަރަބިކާ ކޮފީ ގަހުގެ މޭވާއިންނެވެ. މިއަދު ދުނިޔޭގެ ކޮފީގެ 90 އިންސައްތަ އުފައްދަނީ ތަރައްޤީވަމުން އަންނަ ޤައުމުތަކުގައެވެ. ޚާއްޞަކޮށް ދެކުނު އެމެރިކާ، ވިއެޓްނާމް އަދި އިންޑޮނޭޝިއާގައެވެ. ނަމަވެސް މި އުފެއްދުންތައް ބޭނުންކުރަނީ މައިގަނޑު ގޮތެއްގައި މުއްސަނދި އަދި ސިނާއީ ޤައުމުތަކުގައެވެ.
ޖަރުމަނުގެ ފިލޯސަފަރ އަދި ސޯޝިއޮލޮޖިސްޓް ޔޯގަން ހެބަރމާސް ދެކޭގޮތުގައި، ޔޫރަޕްގެ އިންސާނުން ތަހުޒީބު ވުމުގެ ހަރަކާތުގައި ކޮފީގެ ދައުރު ވަރަށް މުހިންމެވެ. 17 އަދި 18 ވަނަ ގަރުނުގައި އެ ބައްރުގައި ފެޝަނަކަށް ވެގެން ދިޔަ ކޮފީ ހައުސްތައް ވެގެންދިޔައީ އާންމުންގެ ސައްލާ މާލަމްތަކަށާއި މަޝްވަރާތަކާއި ފާޑުކިޔުންތަކުގެ މަރުކަޒުތަކަކަށެވެ.
ކޮފީ އުފެއްދުމަކީ އިންސާނުން އަޅުދާސްކުރުމުގެ ތާރީކާއި ދޮން މީހުންގެ ވިޔަފާރިއާ ގުޅިފައިވާ ކަމެކެވެ. ފްރާންސްއިން ހައިޓީގައި ކޮފީގެ ދަނޑުވެރިކަމަށް އެފްރިކާ އިން ވަގަށް ނަގައިގެން އިންސާނީ ވަގުފާރިއަށް ގެންދިޔަ އަޅުން ބޭނުންކުރިއެވެ. 19 ވަނަ ގަރުނުގައި ބްރެޒިލްއިން ދުނިޔޭގެ ކޮފީގެ ތިންބައިކުޅަ އެއްބައި އުފެއްދީ ވެސް އިންސާނީ ވަގުފާރިއަށް ވަގަށް ނެގި އެފްރިކާގެ އަޅުން ބޭނުންކޮށްގެންނެވެ. މިއަދު ދުނިޔޭގައި ދުވާލަކު 2 ބިލިއަނަށްވުރެ ގިނަ ކޮފީ ތަށި އުފައްދާ ކަމަށް ލަފާކުރެވެއެވެ. އަދި މިއީ އަހަރަކަށް 90 ބިލިއަން ޑޮލަރެވެ.
