ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް އުފުލާފައިވާ ރިޝްވަތާއި މަނީ ލޯންޑަރިންގެ ދައުވާގެ ތަހުގީގު މަރުހަލާގައި އެމަނިކުފާނު ހަނުހުންނެވުމުން، މިއަދު ޝަރީއަތުގައި ދިފާއީ ހެކި ހުށަހެޅުމުގެ ފުރުސަތު ދީގެން ނުވާނެ ކަމަށް ދައުލަތުން ކްރިމިނަލް ކޯޓުގައި އެދިއްޖެ އެވެ.
ކްރިމިނަލް ކޯޓުގައި ބޭއްވި އަޑުއެހުމުގައި ދައުލަތުގެ ވަކީލުން ވިދާޅުވީ، ތަހުގީގުގައި ހާމަނުކޮށް ހިފަހައްޓާފައިވާ ހެކިތަކެއް ޝަރީއަތުގެ މަރުހަލާގައި ހުށަހެޅުމަށް ފުރުސަތު ދިނުމަކީ ގާނޫނީ ގޮތުން ރަނގަޅު ކަމެއް ނޫން ކަމަށެވެ. ޔާމީންގެ ފަރާތްޕުޅުން ދިފާއީ ހެކިންގެ ގޮތުގައި ހުށަހަޅުއްވާފައިވަނީ ރައީސް މުއިއްޒުގެ ސަރުކާރާ ގުޅޭ ފަރާތްތަކެކެވެ. އޭގެ ތެރޭގައި މާލޭގެ ކުރީގެ ޑެޕިއުޓީ މޭޔަރު އަދި މިހާރު ޔޫތު މިނިސްޓަރުގެ އެޑްވައިޒަރު އަހްމަދު ނަރީޝްއާއި، ވިލިމާލެ ދާއިރާގެ މެންބަރު މުހައްމަދު އިސްމާއީލް އަދި ހުޅުދޫ ދާއިރާގެ މެންބަރު މުހައްމަދު ޝާހިދުގެ އިތުރުން ޑޮލަރު މާރުކުރިކަން ދައްކުވައިދޭ ލިޔުމެކެވެ. ދައުލަތުން ވަނީ އެމަނިކުފާނުގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ ފައިސާކަން ސާބިތުކުރަން ހުށަހެޅުއްވި އެ ހެކިތައް ބަލައިނުގަތުމަށް އެދިފައެވެ.
އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި އެއް މިލިއަން ޑޮލަރުގެ ރިޝްވަތު ނަންގަވައި، އެ ފައިސާ ލޯންޑަރކުރެއްވި ކަމުގެ ދައުވާ ޔާމީންގެ މައްޗަށް ކުރާއިރު، މި މައްސަލާގައި ފެލިދޫ ދާއިރާގެ ކުރީގެ މެންބަރު ޔޫސުފް ނައިމްގެ މައްޗަށް ވެސް ދައުވާކުރެއެވެ. މި މައްސަލާގައި ކުރިން ޔާމީން 11 އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކުރި ނަމަވެސް، ހައި ކޯޓުން ވަނީ އެ ހުކުމް ބާތިލުކޮށް، މައްސަލަ އަލުން ބެލުމަށް ކްރިމިނަލް ކޯޓަށް ފޮނުވާލާފައެވެ.
މިއަދުގެ އަޑުއެހުމުގައި ޔާމީންގެ ވަކީލު ހަމްޒާ ލަތީފް ވަނީ ހެއްކާ ބެހޭ ގާނޫނުގެ 48 ވަނަ މާއްދާއާއި 49 ވަނަ މާއްދާއަށް ހަވާލާދެއްވައި، ކޮރަޕްޝަންގެ ކުށް ސާބިތުވެފައިވާ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑރެކްޓަރު އަބްދުﷲ ޒިޔަތުގެ ހެކިބަސް މިހާރު އަމަލުކުރަމުންދާ ގާނޫނުގެ ދަށުން ބަލައިގަނެވޭނެ ގޮތެއް ނެތް ކަމަށް ވިދާޅުވެފައެވެ. މި ކަމަށް ރައްދު ދެއްވަމުން ދައުލަތުގެ ވަކީލު އަހުމަދު ޝަފީއު ވިދާޅުވީ، އަދީބާއި ޒިޔަތަކީ އެ ކޮރަޕްޝަންގެ މައުލޫމާތު އެންމެ ރަނގަޅަށް ހުރި ދެ މީހުން ކަމަށް ބަލަން ޖެހޭނެ ކަމަށެވެ.
ޝަރީއަތުގެ އަޑުއެހުން ނިންމާލެއްވުމަށް ފަހު ކޯޓު ސަރަހައްދުގައި ހުންނަވާ ޔާމީންގެ އިސް ވަކީލު، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވީ، މިއަދުގެ ޝަރީއަތުން ފެނިގެންދިޔައީ ކުރީގެ ރައީސް ޔާމީން އަނބުރާ ޖަލަށް ލުމަށް ދައުލަތުން ފެންބޮވައިގެންފައި އޮތް މިންވަރު ކަމަށެވެ. އަދި ވޭތުވެދިޔަ އަށް އަހަރު ދުވަހު ދައުވާއެއްގެ ތެރޭގައި ޔާމީން ތާށިކޮށްގެން އުޅެނީ ދައުލަތުން އިސްވެ އޮވެ އިންތިޒާމީ ގޮތެއްގައި އެކަން ރާވައިގެން ކަމަށްވެސް އޭނާ ތުހުމަތުކުރެއްވިއެވެ.
ކްރިމިނަލް ކޯޓުގައި މިއަދު އޮތް އަޑުއެހުމުގައި ޝަރީއަތުގެ ކުރިން ހުށަހެޅި ހުށަހެޅުންތަކާ މެދު ގޮތެއް ނިންމުމަށް އަންނަ އޮކްޓޯބަރު މަހުގެ 12 ވަނަ ދުވަހު އަޑުއެހުމެއް ބޭއްވުމަށް ވަނީ ތާވަލުކޮށްފައެވެ.
